Psa 19 | TVK | STEP | Suv toto Deved iaxa tetisi Hitu xil xa di nesao di lapisen minahinen te xeihen na Hi. E tilang hat mun pisen ni xa holesok xil vus xa Hi di pol ni bos pupu.

Psalms 19

Holesok xil te tilang hat e rae xil na Hi di lapisen minahinen te xeihen nan

Suv toto Deved iaxa tetisi

1 Hitu xil xa di nesao di lapisen minahinen te xeihen na Hi.
E tilang hat mun pisen ni xa holesok xil vus xa Hi di pol ni bos pupu.
2 Melele xa meteneai mistal e makeo roroh, di pisin xeihen na Hi ba vuma ... mea mun e melengien sav.
E aveti mun di bit rat kilakilen usil Hi Suv ba vuma ... mea rilomun e vongien sav.
3 Neta xil ak latasepin ti, e rae xil tovuol tengan rateong ni xil.
4 E tave ti neta xa mak, xil di lasa longeongen usil Hi mikapis be rute xil vus,
e moletin xil ngasen te ut etan mei lakila xa Hi da.
Meteneai xa de nesao, Hi milingi de voninen.
5 Makoe xil vus xi di mea del sien
nggoni moletin tei xa besi xi tengan valoh e lohen tei.
6 Xi di mea e ri tilang hat tei e di miloh tengan vahe rin sav.
Misak ni, ut xil vus mitin, neta tovuol mikila vaxus ra ni.

Rae xil na Hi

7 Rae xil na Iahova bos pupu;
di misa xeihen mi meulien nar.
Hitxatien nan xil, rakila raling nenesien nar en,
e di misa metisouen mi ngan xil xa latasukul kuhi ti.
8 Rae xil na Iahova momal tevi,
e ngan xil xa lalong xati lihesi xil.
Melele xa Hi misemae ni xir ni neta tei, ralonge ralong kila,
e di misa kilakilen mi xir ngasen.
9 Momal tengan ripisen merereen nar mi Iahova,
e ti ripisen ni mini vehakut.
Holesok xil vus xa Hi di biteni be reitin,
e lamal tevi.
10 Xil labos mak mu lali holesok xil vus e ut etan;
e kekasen teni mili kekasen te anien xil vus. ^{▼▼19:10 Kekasen teni mili kekasen te 'hani.'}
11 Sepinien nam xil ak di lasel xat nou, moletin te polien nam, usil sexien xil xa bos.
E ngan xil xa di lapol nggusili, lihur huite teni xa ihos pupu.

12 Tave ti neta xa ngan ak be reitin, xamem masakras mapus sein tesaen namem xil.
Misak ni, Hi Suv, xosxa napol ni neta tova misa xa natakil ti, uhur rati li ra nou.
13 E tesaen xil xa natapus kil ti xa di napol ni, usikoe xol nou li tengan ninamot ti mun en.
Onamaen tesaen xil ak ti linatel nou e suse xa tamal ti.
Upol ni meulien navan imese,
e nimeluv ra xeihen te tesaen.
14 Iahova, oteh meulien e nou e di nanggus pe hem.
Ieok bei pupu xa sepinien navan xil e nenemien xil vus navan imal ihusil nenemien nam.